"Xəzər Lənkəran"ın heyətində 2 itki var

Azərbaycan kubokunun yarımfinal mərhələsində “Bakı” zəfəri ilə finala adlayan “Xəzər Lənkəran” dünən keçirilən bərpa məşqindən sonra bu gün, səhər saatlarında AZAL-la keçiriləcək matçın hazırlığına start verdi. Futbolxeber.az-ın məlumatına görə, Lənkərandakı bazanın ehtiyat meydançasında baş tutan məşqdə futbolçular Con Bencamin Toşakın rəhbərliyi altında saat yarım ərzində məşq prosesini davam etdirdi. Hazırda komandanın heyətində braziliyalı müdafiəçi Vanderson Skarduellinin zədəsi məşqçilər korpusunu narahat edən yeganə məqamdır. “Bakı” ilə cavab qarşılaşmasında zədələnən müdafiəçiyə “sağ ayaq pəncəsinin qapalı sınığı” diaqnozu qoyulub. Digər itki isə hücumçu Dimitrios Sialmasla bağlıdır. 27-cı turda “Sumqayıt”la qarşılaşmanın son dəqiqələrində qırmızı vərəqə alan forvard AZAL-la qarşılaşmada komandaya kömək edə bilməyəcək. Bu gün günorta saatlarında “Xəzər Lənkəran” doğma şəhərdəki hazırlığını başa çatdırıb Bakıya yola düşüb. Komanda axşam məskunlaşacağı oteldə istirahət edib sabah oyun öncəsi son məşqinə çıxacaq.