“Qəbələ” üçün yaxşı olan nə varsa, bacardığımı əsirgəməmişəm"

“Stenli Brard çoxlu nailiyyət qazanmış məşqçidir. Biz onun Hollandiyada “Feyenoord” Akademiyasında gördüyü işdən razıyıq”. Futbolxeber.az-ın məlumatına görə, bu sözləri “Qəbələ” klubunda müşavir vəzifəsində çalışan Toni Adams deyib.

 

Adams iyundan “Qəbələ” Akademiyasının direktoru kimi fəaliyyətə başlayacaq Stenli Brardın nailiyyətlərindən və özünün “Qəbələ” prezidentinə məsləhətçi funksiyasından danışıb: “Onun vaxtında çempionatda yaxşı nəticələr qazanılıb. Bizim üçün fərəhli haldır ki, Stenlini qazana bildik. “Feyenoord” Akademiyasını 9 ildən çox müddətdə yüksəklərə ucaldıb. Hazırda “Feyenoord”un əsas komandasında akademiyadan çıxmış çoxlu oyunçu var”.

 

Adams müşavir kimi işindən və yenidən məşqçiliyə başlamaq istəyindən danışıb: “Mənim qarşımda qoyulan şeylərin çoxunu yerinə yetirə bilirəm və “Qəbələ” üçün yaxşı olan nə varsa, bacardığımı əsirgəməmişəm. Ancaq mən məşqçilik həyatına üstünlük verirəm. Çəkmələrimi yenidən geyinib özümü bu işdə sınamaq, kömək etmək, bu oyunda öyrəndiklərimi kimlərəsə ötürmək daha yaxşı olardı. Mən ofisdə bir neçə saat qala bilərəm. Sonra ordan çıxmalı və nəsə etməliyəm. Çünki mən bayırda çox olan insanam”.