Babək Quliyev: "Toşak nizam-intizam məsələlərinə çox ciddi yanaşır"

"Bugünkü gündə təkcə Dimitris Sialmasın deyil, ümumiyyətlə heç bir futbolçunun "Xəzər Lənkəran"dan göndərilməsi gündəmdə deyil". Bu sözləri Fubolxeber.az saytına verdiyi açıqlamada "Xəzər Lənkəran"ın idman direktoru Babək Quliyev deyib.

Ölkə mətbuatında Dimitrios Silmasın qarşıdakı günlərdə "Xəzər Lənkəran"dan göndəriləcəyi haqda yayılan xəbərlərə aydınlıq gətirən Babək bəy bu haqda yalnız Con Toşakın qərar qəbul edəcəyini bildirib: "Komandadan kimin gedib-getməyəcəyinə Toşak qərar verir. O isə bugünkü günə kimi bizə Sialmasla bağlı hər hansı söz deməyib. Sabah nə baş verəcəyini indidən deyə bilmərik. Gördüyünüz kimi, baş məşqçi bir neçə gün əvvəl Alvizin xidmətinə ehtiyac duymadığını bildirdi. Onun nizam-intizamı pozduğunu qeyd edən Toşak Alvizin komandadan getməsini istədi. Əminliklə söyləyirəm ki, Toşak nizam-intizam məsələlərinə çox ciddi yanaşır".

Klub rəsmisi Alvizin konkret hansı səbəbdən göndərilməsi haqda sualımızı belə cavablandırdı: "Hər bir klubun daxili nizam-intizam kodeksi var. Alviz də nizam-intizamı pozduğuna görə klubdan kənarlaşdırıldı. Alvizin konkret hansı hərəkəti etdiyini, nəyə görə göndərilməsinin səbəbini açıqlamağım düzgün çıxmaz. Yalnız onu deyə bilərəm ki, Alviz özü nəyə görə komandadan göndərilməsini çox yaxşı bilir".