Mansurov və Genov siyahıya daxil oldular, Poladov debüt etdi

Premyer Liqanın 27-ci turu çərçivəsində “Simirq”la keçirilən matç "İnter" üçün bir sıra statistik göstəricilərlə yadda qalıb. Futbolxeber.az-ın məlumatına görə, “Simurq”la oyunda dubl etməklə fərqlənən bolqarıstanlı yarımmüdafiəçi Daniel Genov və çempionatda ilk dəfə əsas heyətdə meydançaya çıxan və ikinci hissədə zaqatalıların qapısından qol keçirən “İnter”in gənc forvardı Ramil Mansurov klubun tarixi ərzində bu turnirdə fərqlənə bilmiş “İnter”in sayca 71-ci və 72-ci futbolçuları oldular. Mövsümün gedişində bu siyahıya əvvəllər Georgiya Adamiya, Slavço Georgiyevski, Yuri Fomenko, Fuad Bayramov və artıq “İnter”dən ayrılmış Cako Arafat düşmüşdülər.

Bundan başqa, bu oyun “İnter”in qapıçısı Elşən Poladovun debüt etməsilə də yadda qaldı. Daha doğrusu, bu qapıçının komandanın heyətində çempionata qayıtmasıyla diqqəti cəlb etdi. Belə ki, Elşən Poladov 2006/2007-ci il mövsümündə “İnter”in qapısını qorumuşdu. Qeyd edək ki, Kaxaber Tsxadadzenin çempionatın 27 oyununda istifadə etdiyi futbolçuların sayı 29-a çatdı. “İnter”in heyətində daha çox meydançada olan futbolçu Slavço Georgiyevskidir - 2306 dəqiqə. Ən az oynayan gənc yarımmüdafiəçi Coşğun Diniyevdir-15 dəqiqə.

“İnter”in ən yaxşı bombardiri 7 qolla Baçana Tsxadadzedir. Təqribən hər 259 dəqiqən bir qol vurur. Ən çox sarı vərəqə alan futbolçu Vladimir Levin və Slavço Georgiyevskidir-8.

“Simurq” üzərində 5:0 hesablı qələbə “İnter”in tarixində sayca 4-cüdür. Belə ki, 2005/2006-cı il mövsümündə komanda doğma stadionda “Gəncə”ni 5:0 hesabıyla məğlub etmişdi. Növbəti mövsümdə “İnter” Tovuzun “Turan” komandasına 1:7 hesabıyla qalib gəlmişdi və 2009/2010-cu il mövsümündə Kaxaber Tsxadadzenin yetirmələri səfərdə “Muğan”ı 1:6 hesabıyla darmadağın etmişdilər.