ÇSKA-nın sabiq prezidenti: “Qarabağ”dan qorxmuruq”

ÇSKA-nın və Bolqarıstan Futbol İttifaqının sabiq prezidenti Valentin Mixov bu gün UEFA Avropa Liqasının 2-ci təsnifat mərhələsində "Qarabağ"a qarşı keçiriləcək cavab oyunu barədə danışıb.

Futbolxeber.az saytının topsport.bg-yə istinadən verdiyi məlumata görə, o, Sofiya klubunun mərhələ adlamaq üçün kifayət qədər güclü olduğunu bildirib:

Mixov Bakıdakı ilk oyunda ÇSKA-nın rəqibindən üstün oynadığını deyib: "Taktiki hazırlıq və məşqçilərin futbolçuları necə yerləşdirəcəyi çox önəmlidir. ÇSKA-nın kifayət qədər yaxşı oyunçuları var. Xristoya məsləhət verməyəcəyəm. Futbolçular özlərinə inanmalı, başlarını dik tutmalıdırlar. ÇSKA böyük klubdur. Onlar emblemin dəyərini hiss etməlidirlər. Özünəinam, ürək və ağılla oynamaq vacibdir.

"Qarabağ" yaxşı komandadır. Amma düşünürəm ki, Bakıda onları üstələmişdik. İndi də həmin oyunu təkrarlayıb ən azı 1-2 qol vurmalıyıq. Emosiyalar düşməndir. Xarakter göstərməliyik. Biz ÇSKA-yıq, heç kimdən qorxmuruq. Cümə axşamı meydana inamla çıxmalı, rəqibi əzməliyik. Geriyə yox, yalnız irəli oynamalıyıq. Bu matçda qələbə mütləqdir".