“Neftçi”çiylə oyunda cəzalanan futbolçu “Qalatasaray”a “qiymət oxudu”

 “Qalatasaray” rəsmiləri Milan “İnter”inin müdafiəçisi Andrea Ranokkiya ilə razılığa gələ bilməmələrinin səbəbini açıqlayıblar. Futbolxeber.az-ın məlumatına görə, keçidlə bağlı “Qalatasaray”la “İnter” arasında heç bir problem olmayıb. Tərəflər təcrübəli müdafiəçinin mövsümün sonuna kimi icarə əsasında İstanbul klubunda çıxış etməsi ilə bağlı razılığa gəliblər. Lakin Ranokkiyanın “Qalatasaray”dan tələb etdiyi məvacib “Cim-Bom”u fikrindən daşındırıb. Belə ki, italyan futbolçu Türkiyədə keçirəcəyi 4 ay üçün “Qalatasaray”dan 2,4 milyon avro tələb edib. Bu tələbi rədd edən “Qalatasaray” rəsmilərinin Ronakkiyanın istəyinə verdikləri qısaca cavab belə olub: “Bu rəqəm çox gülməlidir”.

Xatırladaq ki, Andrea Ranokkiya ötən mövsüm Avroliqanın qrup mərhələsinin ikinci turu çərçivəsində “Neftçi”yə baş tutan oyunda meydanda olub. Bakıda keçirilən görüşdə 64-cü dəqiqədə Joel Obinin əvəzinə meydana daxil olan futbolçu, 8 dəqiqə sonra sarı vərəqə ilə cəzalanıb.