Maurinyo: “Komanda meydana çıxarkən futbolçuları mən yox, massajçımız ruhlandırdı”

“Çelsi”nin baş məşqçisi Joze Maurinyo İngiltərə Premyer Liqasının 24-cü turu çərçivəsində “Mançester Siti”ni 1:0 hesabı ilə məğlub etdikləri oyundan danışıb. Futbolxeber.az-ın məlumatına görə, portuqaliyalı mütəxəssis yenə də ənənəsinə sadiq qalaraq, ilginc açıqlaması ilə diqqət çəkib: “Oyundan öncə komanda meydana çıxarkən futbolçuları mən yox, massajçımız Billi Makkalox ruhlandırdı. O, şotland ləhcəsi ilə elə danışır ki, mən heç nə başa düşmürəm. Ancaq onu anladım ki, Billinin çıxışı futbolçulara əla təsir etdi. Nitq bitdikdən sonra onlar Makkaloxa minnətdarlıq edib, bir-birilərinə uğurlar arzuladılar. Tam ciddiyəm, mən futbolçularla sonuncu dəfə günorta danışmışdım. Bütün tapşırıqlarımı da onda vermişdim. Billi həqiqətən də möhtəşəm idi”.