Türkiyədə 1 klub prezidenti və 17 hakim saxlanıldı

Türkiyədə mərc oyunlarında iştirakda şübhəli bilinən 1 klub prezidenti və 17 hakim saxlanılıb.

Futbolxeber.az saytının məlumatına görə, bu barədə İstanbul Baş Prokukorluğu açıqlama yayıb.

Saxlanılanlar arasında "Eyüpspor"un prezidenti Murat Özkaya, "Kasımpaşa" klubunun sabiq sahibi Turgay Ciner və keçmiş prezidenti Mehmet Fatih Saraç da var.

Hakimlər vəzifə səlahiyyətlərindən sui-istifadə və oyunun nəticəsinə təsir etmək ittihamı ilə saxlanılıb. İstintaqa cəlb edilən 21 nəfərdən 18-i ilə bağlı qərar verilib. Onlardan ikisinin xaricdə olduğu, birinin isə ünvanında olmadığı bildirilir.

Bir neçə gün əvvəl Türkiyə Futbol Federasiyasının prezidenti İbrahim Hacıosmanoğlu keçirdiyi mətbuat konfransında 571 aktiv hakimdən 371-nin mərc hesabının olduğunu, onlardan isə 152-nin aktiv mərc oynadığını açıqlamışdı. Daha sonra siə Türkiyə Futbol Federasiyası mərc oyunlarında iştirak edən 149 hakim haqqında qərar verib. Onlar 8-12 ay aralığında hakimlikdən uzaqlaşdırılıblar.