Elxan Məmmədov La Massana idman kompleksinin açılışında

"FIFA Forward Awards” layihəsi çərçivəsində ikinci yeri tutan Andorranın La Massana idman kompleksinin inşası başa çatıb.

Futbolxeber.az-ın FİFA-nın saytına istinadən verdiyi məlumata görə, bu gün kompleksin rəsmi açılış mərasimi keçirilib.

Tədbirdə FİFA-nın Avropa Milli Assosiasiyalar üzrə direktoru Elxan Məmmədov da iştirak edib.

E.Məmmədov çıxışı zamanı Andorra Futbol Federasiyasının layihənin reallaşması üçün ürəkdən çalışdığını vurğulayıb:

“Andorrada torpaq sahələrinin məhdud olmasını nəzərə alsaq, bu, böyük uğurdu. Ərazi çatışmazlığına baxmayaraq, Andorra Futbol Federasiyası və qurumun prezidenti Alvares bu layihənin reallaşması üçün ürəkdən çalışdılar. Onlar lazımi yer tapmaq və futbolçuların şəraitini yaxşılaşdırmaq üçün əllərindən gələni etdilər”.

Andorra Futbol Federasiyasının prezidenti Feliks Alvares isə FİFA və UEFA rəsmilərinin tədbirə qatılmasını Andorra futbolu üçün önəmli hadisə adlandırıb.

Qeyd edək ki, 2021-ci ildə inşasına başlanan La Massana idman kompleksi Andorrada ölkənin müxtəlif yaş qrupları üzrə yığmaları üçün meydança çatışmazlığına son qoyacaq. Kompleksin inşası əsasən FİFA və UEFA tərəfindən ayrılan maliyyə vəsaiti hesabına inşa edilib. Andorra Futbol Federasiyası isə layihənin reallaşması üçün 4,5 milyon dollar xərcləyib.