Krım klubu Rusiya çempionatında iştirak etdi - TARİXDƏ İLK

Tarixdə ilk dəfə olaraq Krım klubu Rusiya çempionatında iştirak edib.

Futbolxeber.az saytının məlumatına görə, “Rubin Yalta” klubu Rusiya çempionatında meydana çıxan ilk Krım klubu ilə tarixə düşüb.   

İkinci liqada mübarizə aparan “Rubin Yalta” ilk tur çərçivəsində bu gün səfərdə “Bioloq-Novokubansk”ın qonağı olub. Görüş 1:1 hesabı ilə başa çatıb. 7-ci dəqiqədə rəqib qapısına yol tapan Azamat Atayev Krım klubunun Rusiya çempionatlarında ilk qolunun müəllifi olub. İkinci yarıda “Bioloq-Novokubansk” İlya Mamkinin qolu sayəsində məğlubiyyətdən qaçıb - 1:1.

Xatırladaq ki, “Rubin Yalta” ilə yanaşı, digər Krım təmsilçisi “Sevastopol” da Rusiya ikinci liqasında iştirak üçün sənədləşmədən uğurla keçib. “Sevastopol” ilk turda öz meydanında Rostov təmsilçisi OİK-i qəbul edəcək.