“Real” və “Barselona” arasında oyun heç vaxt yoxlama matçı olmayıb, olmayacaq da”

“Real”ın baş məşqçisi Karlo Ançelotti Amerika turnesi çərçivəsində “Barselona”ya qarşı keçirəcəkləyi oyundan danışıb.

Futbolxeber.az saytının ESPN-ə istinadən verdiyi məlumata görə, italiyalı mütəxəssis 2 əzəli klubun qarşıdurmasının heç vaxt adi yoxlama görüşü olmadığını bildirib:

“Oyunun harda keçirilməsi önəmli deyil. Üstəlik, bu cür matçlar yoxlama görüşü xarakteri daşımır. Bu klubun qarşıdurması xüsusi əhəmiyyət daşıyır. Keçən il biz fantastik atmosferə şahidlik etmişdik. Əminəm ki, Dallasda da belə olacaq. “Real” və “Barselona” arasında oyun heç vaxt yoxlama matçı olmayıb, olmayacaq da”.

Qeyd edək ki, “Real”la “Barselona” arasında matç 29 iyulda keçiriləcək. Madrid klubu həmçinin iyulun 23-də “Milan”, 26-da “Mançester Yunayted” və avqustun 3-də “Yuventus”la üz-üzə gələcək.