“Millidəki ən yaxşı oyunlarımı Enrikenin dövründə keçirmişəm”

“Çelsi”nin müdafiəçisi Sezar Aspilikueta həmyerlisi, millidəki sabiq baş məşqçisi Luis Enrikenin London klubunu çalışdıracağı barədə yayılan xəbərlərə münasibət bildirib.

Futbolxeber.az saytının məlumatına görə, ispan müdafiəçi klub rəhbərliyinin hazırda namizəd mütəxəssislərlə danışıqlar apardığını deyib:

“Klubdakı müəyyən şəxslər gələcək baş məşqçi ilə danışıqlar aparırlar. Təbii ki, biz onlara güvənirik, çünki komanda üçün ən düzgün seçimi etməyə çalışırlar. Necə olacağını isə zaman göstərəcək. Əlbəttə, mənim üçün Luis Enrike ilə birgə çalışmaq çox xoş olardı. Çünki millidəki ən yaxşı oyunlarımı onun dövründə keçirmişəm”.

Qeyd edək ki, Qrem Potteri istefaya göndərən “Çelsi”nin baş məşqçi postu müvəqqəti olaraq Frenk Lemparda tapşırılıb. Hazırda Luis Enrike də daxil bir neçə məşqçinin adı London klubu ilə yanaşı hallanır.