Kadi kimləri ən yaxşı hesab edir?

"Krasnodar”ın yarımmüdafiəçisi Kadi Borges Rusiya Premyer Liqasında ən yaxşı hesab etdiyi futbolçuların adlarını açıqlayıb.

Futbolxeber.az saytının "Matç TV"yə istinadən verdiyi məlumata görə, "Qarabağ"ın sabiq futbolçusu həmçinin, Rusiya çempinatının səviyyəsi haqda danışıb:

“Çempionatın səviyyəsi çox yüksəkdir. Mən Rusiya Premyer Liqasındakı güclü futbolçulardan Malkolmu, Klaudinyonu (hər ikisi "Zenit") qeyd edərdim. Onlar Braziliyada oynayanda da fərqli idilər. Eduard Spertsyan ("Krasnodar") hələ çox gənc olsa da, artıq böyük zirvələrə çatmaq formasındadır.

Kvinsi Promes ("Spartak") çox güclü oyunçudur. Hətta Rusiyaya gəlməmişdən əvvəl mən onun oyununu izləyirdim və yaxşı futbolçu olduğunu görürdüm”.

Qeyd edək ki, bu ilin yanvarında "Qarabağ"dan "Krasnodar"a keçən Kadi bu komandada meydana çıxdığı 4 oyunda 3 qol vurub.