Bileti olan 1000 “İnter” azarkeşi stadiona buraxılmadı

Çempionlar Liqasının 1/8 final mərhələsinin cavab oyunu “Portu” - “İnter” matçından öncə insident yaşanıb.

Futbolxeber.az saytının məlumatına görə, bileti olan 1000 “İnter” azarkeşi stadiona buraxılmayıb.

Belə ki, “Portu” əvvəlcə qonaq azarkeşlərin yalnız onlar üçün ayrılmış sektora buraxılacaqlarını bəyan etmişdi. Daha sonra isə bildirilmişdi ki, digər sektora bileti olan italyan fanatlar da stadionda yerlərini ala bilərlər. Amma bu halda onların üzərində sevimli komandalarına aid hər hansı bir atribut olmamalıdı.

Lakin oyundan öncə məlum olub ki, “İnter” fanatları “Draqau” stadionunda yalnız onlar üçün ayrılmış sektorda əyləşə bilərlər. Nəticədə digər sektorlara bileti olan qonaq fanatlar arenaya buraxılmayıblar.