“Tottenhem”də qarşıdurma: futbolçuların bəziləri Kontenin göndərilməsini istəyir

“Tottenhem”in futbolçularının bəziləri Antonio Kontenin dərhal baş məşqçi vəzifəsindən göndərilməsini istəyir.

Futbolxeber.az saytının məlumatına görə, London klubu həftə sonu Premyer Liqanın növbəti turu çərçivəsində səfərdə autsayder “Sautgempton”la oyunda 3:1 hesabı ilə öndə olsa da, matçın sonuna əlavə olunmuş üçüncü dəqiqədə qapısına qol görməklə qələbəni əldən verib (3:3).

Oyundan sonra keçirilən mətbuat konfransında baş məşqçi Antonio Konte xal itkisinə görə futbolçuları tənqid edib, onları “eqoist” adlandırıb. Məhz italiyalı mütəxəssisin bu açıqlaması narazılıq doğurub.

Futbolçuların bir qismi baş məşqçinin bu açıqlaması ilə bütün hədləri aşdığını düşünürlər. Bu səbəbdən də onlar dərhal Kontenin vəzifəsindən göndərilməsini istəyirlər.  

Qeyd edək ki, “Tottenhem” hazırda 28 oyundan 49 xalla Premyer Liqada dördüncü pillədə qərarlaşıb. 2 oyun az keçirən “Nyukasl” 47 xalla beşinci pillədədir.