"Beşiktaş" 4, Biliç 3, Melo 2 oyunluq cəzalandı

Türkiyə Futbol Federasiyası Superliqanın V turu çərçivəsində keçirilən və azarkeşlərin meydana daxil olması səbəbindən 90+3-cü dəqiqədə yarımçıq dayandırılan 333-cü “Beşiktaş” - “Qalatasaray” (1:2) derbisi ilə bağlı cəzaları açıqlayıb. Futbolxeber.az-ın məlumatına görə, Atatürk Olimpiya Stadionunda keçirilən qarşılaşmada “Beşiktaş” ev sahibi komanda olduğu üçün kluba 4 matç azarkeşsiz oynama cəzası verilib. Digər tərəfdən oyun davam edərkən hakimə etirazları səbəbindən tribunaya göndərilən “ağ-qaralar”ın baş məşqçisi Slaven Biliç isə 3 oyunluq cəzalandırılıb.

Rəqibə sərt şəkildə müdaxilə edən və qırmızı vərəqə alan “Qalatasaray”ın braziliyalı futbolçusu Felipe Melo isə 2 oyun komandasına kömək edə bilməyəcək.

Bundan başqa "Beşiktaş" ümumilikdə 73 min, "Qalatasaray" isə 13 min lirə həcmində cərimələnib.