Dünyanın ən nüfuzlu kişilərinin siyahısı açıqlandı: Ronaldo 6-cı, Messi 11-cidi

YouGov Araşdırma Mərkəzi dünyanın ən nüfuzlu kişilərinin siyahısını açıqlayıb.

Futbolxeber.az saytının məlumatına görə, idmançılar arasında ən yaxşı göstərici Kriştianu Ronaldoya məxsusdur. Portuqaliyalı futbolçu sıralamada altıncı yeri tutub.

Reytinqin ilk sırasında ABŞ-ın sabiq prezidenti Barak Obama qərarlaşıb. İlk “beşlik”də həmçinin, Bill Qeyts, Çin Xalq Respublikasının prezidenti Si Tszinpin, Hindistanın baş naziri Narendra Modi və tanınmış aktyor, döyüş növləri üzrə mütəxəssis Çeki Çan yer alıb.

Futbol aləmində Kriştianu Ronaldonun əsas rəqibi olan Lionel Messi isə sıralamada 11-ci yeri tutur. Argentinalı ulduz Rusiya prezidenti Vladimir Putini 1 pillə qabaqlayıb. 13-cü yerdə isə daha bir tanınmış idmançı, dünya basketbolunun canlı əfsanəsi Maykl Cordan qərarlaşıb.

Qeyd edək ki, dünyanın ən nüfuzlu kişilərinin siyahısı 42 ölkədə 45 mindən çox insan arasında aparılmış sorğu nəticəsində tərtib edilib.