Bakıya səfər “Arsenal”ın müdafiəçisini qorxutmur

Tula “Arsenal”ının müdafiəçisi Anri Xaquş Avroliqanın II təsnifat mərhələsinin püşkatmasını dəyərləndirib.

Futbolxeber.az saytının məlumatına görə, Rusiya təmsilçisi ikinci mərhələdə “Speranta” (Moldova) - “Neftçi” cütünün qalibi ilə üz-üzə gələcək.

Xaquş püşkün nəticəsindən razılığını gizlətməyib:

“Püşkatma bizim üçün heç də pis alınmadı. Amma unutmaq olmaz ki, avrokuboklarda zəif rəqib olmur, hər bir rəqibə hörmətlə yanaşmaq lazımdır. Qarşıda hazırlıq üçün bir neçə həftə var. Düşünürəm ki, tezliklə optimal formaya düşəcəyik”.

“Speranta” - “Neftçi” cütünün qalibinin hansı komanda olmasından asılı olmayaraq, “Arsenal” səfərə yollanmaq üçün uzun məsafə qət etməli olmayacaq. Bununla bağlı sualı Xaquş belə cavablandırıb:

“Mövsüm ərzindəki uçuşlarımızı, qət etdiyimiz məsafələri nəzərə alsaq, heç bir səfər bizi qorxuda bilməz. Amma aydın məsələdir ki, bərpa üçün mümkün qədər az müddətli uçuşlar daha sərfəlidir. Ümumiyyətlə, bu cür məqamlara çox diqqət ayırmağa ehtiyac yoxdur. Sadəcə meydana çıxıb qələbə qazanmaq və irəli getmək lazımdı”.

İlk oyunun Tulada keçirilməsi ilə bağlı isə “Arsenal”ın müdafiəçisi belə deyib:

“Cavab oyunu üçün üstünlük qazanmaq lazımdı. Əminəm ki, tribunalarda anşlaq yaşanacaq. Azarkeşlər bizi qələbəyə səsləyəcəklər. Bu, bizim üçün böyük üstünlükdür. Bu oyunlar bütün Tula vilayəti üçün tarixi hadisə olacaq. Yaxşı oyun və sərfəli nəticə ilə azarkeşlərimizi sevindirməyə çalışacağıq”.

Qeyd edək ki, “Neftçi” Avroliqanın ilk mərhələsində “Speranta”nı mübarizədən kənarlaşdırsa, “Arsenal”a rəqib olacaq. Tərəflər arasındakı ilk oyun iyulun 25-də keçiriləcək.