"Roma" rəsmisi: "Qarabağ" üzərində qələbə qazanmaqla Tottiyə ad günü hədiyyəsi etmək istəyirik"

“Roma”nın baş icraçı direktoru Umberto Qandini  Çempionlar Liqasının qrup mərhələsinin ikinci turunda "Qarabağ"la oyunöncəsi açıqlama verib.

 

Futbolxeber.az xəbər verir ki, klub rəsmisi "Qarabağ"la oyunun onlar üçün önəmli olduğunu söyləyib: "Rəqib xüsusi komandadı. Avropa Liqası təcrübəsi var, "İnter”lə heç-heçə ediblər. Qrupun digər matçında “Atletiko” ilə “Çelsi” üz-üzə gələcətindən Bakıda qələbə qazanmaq bizim üçün çox vacibdir”.

 

Qandini sentyabrın 27-də 41 yaşı tamam olacaq klubun əfsanəvi futbolçusu Françesko Tottiyə hədiyyəni "Qarabağ"la görüşdə qələbə qazanaraq vermək istədiklərini deyib: “Qrupumuzda iki önəmli komandanın olması normaldır. Avropa Liqasına yollansaq, orda da sona qədər mübarizəmizi aparacağıq. Favorit komandaların özləri arasında qarşılamalardan çox şey asılıdır. Bu səbəbdən də “Qarabağ”la matçlarda maksimum nəticə əldə etməliyik. Oyun günü Totttinin doğum günü olacaq və ona qələbə ilə hədiyyə etmək istəyirik”.

 

Qeyd edək ki, Bakı Olimpiya Stadionunda keçiriləcək “Qarabağ” – “Roma” oyunu saat 20:00-da başlayacaq.