Ukraynalı futbolçu: “Qarabağ” “Liverpul” deyil"

“Çempionlar Liqasının III təsnifat mərhələsində “Kopenhagen”i evdə məğlub etsək də, səfərdə bu üstünlüyü qoruya bilmədik”.

 

Futbolxeber.az xəbər verir ki, bu fikirləri Makedoniyanın “Vardar” klubunun futbolçusu Yevgeni Novak deyib. Avropa Liqasının qrup mərhələsində mübarizə aparan Makedoniya təmsilçisi ilk turda öz meydanında “Zenit”ə böyük hesabla (0:5) məğlub olub.

 

Qarşılaşmadan sonra Rusiya mətbuatına danışan Novak məyus olduqlarını vurğulayıb. Ukraynalı müdafiəçi ÇL-in qrupuna yüksələ bilmədikləri üçün hədəflərinə çatmadıqlarını bildirib:  “Hər şey öz əlimizdə idi. Avropa Liqasının yox, Çempionlar Liqasının qrup mərhələsinə keçmək istəyirdik. Bunun üçün yaxşı şansımız olsa da, istifadə edə bilmədik. “Kopenhagen”i üstələsəydik, pley-off mərhələsində “Qarabağ”la qarşılaşa bilərdik. Bu komandanı isə keçmək olardı. Çünki “Qarabağ” “Liverpul” deyil”.

 

Qeyd edək ki, “Vardar” Avropa Liqasının pley-off mərhələsində “Fənərbaxça”ya qalib gələrək, qrupa adlayıb.