“Qəbələ”nin rəqibləri qələbəsiz qaldılar

Avroliqada “Qəbələ” ilə eyni qrupda yer alan “Maynts”, “Sent-Etyen” və “Anderlext” ölkə çempionatında növbəti oyunlarına çıxıblar.

Futbolxeber.az saytının məlumatına görə, Bundesliqanın 10-cu turunda “Maynts” “Leytspiq”in qonağı olub. “Bavariya” ilə birlikdə Bundesliqada şərikli lider olan “Leytspiq” “Qəbələ”nin rəqibinə şans tanımayıb. İlk hissədə qapısında 3 qol görən “Maynts”ın gücü yalnız fasilədən sonra buraxılan qollardan birinin əvəzini çıxmağa çatıb. 74-cü dəqiqədə Bell təsəlliverici qola imza atıb. 10 turdan sonra 14 xalı olan “Maynts” turnir cədvəlində 10-cu yeri tutur.

“Sent-Etyen” Fransa çempionatının 9-cu turunda səfərdə “Mets”in qonağı olub. Matç qolsuz bərabərliklə başa çatıb. 12 turdan sonra 18 xala malik olan “Sen-Etyen” 9-cu pillədə qərarlaşıb.

“Anderlext” isə Belçika çempionatının 14-cü turunda öz meydanında “Oostende”ni qəbul edib. 66-cı dəqiqədə hesabda geri düşən “Anderlext” yalnız sona 8 dəqiqə qalmış Tielemansın penaltidən vurduğu qolla məğlubiyyətdən qaçıb. 25 xallı “Anderlext” turnir cədvəlində ikinci yeri tutur.