Bakıda gümüş medal qazandı, “Mançester Siti” ilə 3 illik müqavilə imzaladı

İspaniyanın gənclər yığmasının üzvü Braim Dias “Mançester Siti” ilə peşəkar müqavilə imzalayıb. Futbolxeber.az saytının məlumatına görə, 17 yaşlı futbolçu 3 illik sözləşməyə imza atıb. Dias bir neçə gün əvvəl “Suonsi”yə qarşı baş tutan kubok oyununda (2:1) “Mançester Siti”nin əsas heyətində debüt edib.

“Mançester Siti”yə ötən il transfer olunan Dias mayda Bakıda keçirilən 17 yaşadək futbolçular arasında Avropa çempionatının ulduzlarından biri idi. Gənc futbolçunun şərəfini qoruduğu İspaniya yığması finalda Portuqaliyaya uduzmuşdu.

İspan futbolçu “Mançester Siti” ilə rəsmi müqavilə imzalamasını belə şərh edib: “Arzu reallığa çevrildi. İnanıram ki, uğurlarım bununla bitməyəcək. Qvardiola bildirdir ki, dayanmadan çalışmalıyam. Ürəkdən işləsəm, vaxtım gələcək. Bu sözləri baş məşqçidən eşitmək mənim üçün çox xoşdur”.