“Baroş “Qarabağ”la oyunda bunu sübut etdi”

“Milan Baroş Çexiya futbolunun yaşayan əfsanəsidi. O, bunu “Qarabağ”la oyunda bir daha sübut etdi”. Futbolxeber.az saytının məlumatına görə, bunu çexiyalı mütəxəssis Jiri Hayski deyib.

Yerli mətbuata açıqlama verən Çexoslovakiya millisinin sabiq hücumçusu “Slovan”ın Avropa Liqasının qrup mərhələsində “Qarabağ”la keçirdiyi görüşü dəyərləndirib.

Bakıdakı heç-heçəyə görə təəssüflənən 63 yaşlı məşqçi Liberets klubunun forvardı Milan Baroşun ünvanına tərif yağdırıb: “Slovan” Azərbaycanda istənilən kimi oynamaya bilər. Amma futbolda nəticə önəmlidi. Təmsilçimizin qələbəni son anda əldən verməsi üzücü oldu. Bu komandanın uğurlarında əsas pay sahibi kimi Milan Baroşu göstərməliyəm. Bu yaşda 75 dəqiqə “döyüşdü”, qolunu vurdu. Əvəzlənərkən də meydanı krallar kimi tərk etdi”.

Qeyd edək ki, 2:2 hesabı ilə başa çatan “Qarabağ” - “Slovan” matçında qonaqların 2-ci qoluna 68-ci dəqiqədə Milan Baroş imza atıb (apasport.az).