Ukrayna və İngiltərə Avropa çempionatında: Türkiyə millisi Bakıya gəlməyəcək

Mayda Bakıda keçiriləcək 17 yaşadək futbolçulardan ibarət milli komandalar arasında Avropa çempionatını son təsnifat mərhələsinin - Elit raundun oyunları davam edir. Futbolxeber.az saytının məlumatına görə, dünən ikinci və dördüncü qrupda ikinci turun görüşləri oynanılıb. 2-ci qrupda yer alan Türkiyə millisi Ukraynaya 0:3 hesabı ilə uduzub. Daha əvvəl İngiltərə yığmasına məğlub olan (1:3) “ay-ulduzlular” bununla da Bakıda keçiriləcək qitə birinciliyinə qatılmaq şansını itirib. 2 turdan sonra Ukrayna və İngiltərə millilərinin aktivində 6 xal var. Qrup qalibinin adı məhz 2 gün sonra bu komandalar arasında baş tutacaq oyunda müəyyənləşəcək. Hazırkı durumda topların fərqində üstün olan ukraynalıları son matçda 1 xal da qane edir. Lakin son oyununun nəticəsində asılı olmayaraq, hər iki komanda Avropa çempionatında iştirak etmək hüququ qazanıb. Çünki uduzan tərəf 6 xalla qrup ikincisi olacaq ki, bu da Avropa çempionatında çıxış etmək üçün kifayət edəcək.

4-cü qrupda isə vəziyyət daha qarışıqdı. Belə ki, 2 turdan sonra Almaniya və Hollandiya yığmalarının aktivində 4 xal var və son turda bu 2 komanda üz-üzə gələcək. Bu iki rəqiblə heç-heçə oynayan Bolqarıstan isə son turda qrupun autsayderi olan Slovakiyanı sınağa çəkəcək.

Qeyd edək ki, 5-21 may tarixlərində Bakıda baş tutacaq Avropa çempionatına bu ana qədər İtaliya, Bosniya və Hersoqovina, Portuqaliya, İsveç və Belçika yığmaları vəsiqə qazanıb. Meydan sahibi olan millimizi, Ukrayna və İngiltərəni də nəzərə alsaq, artıq çempionat iştirakçılarının yarısının müəyyənləşdiyini söyləmək olar.