“Milan”da qarşıdurma: İnzaginin qovulmasına Qalliani imkan vermədi

“A” seriyasının son turunda “Udineze”yə 1:2 hesabı ilə uduzan “Milan”ın düşərgəsində qarşıdurma yaşanıb. Futbolxeber.az-ın məlumatına görə, oyundan sonra baş məşqçi Filippo İnzaginin futbolçulara xitabən dediyi “bu klubun formasını geyməyə layiq deyilsiniz” sözləri komanda üzvlərinin ürəyincə olmayıb. Komandanın avtobusunda Naycel de Yonq gənc məşqçiyə cavab olaraq, “Sən “Milan”ın baş məşqçisi olmağa layiq deyilsən” deyib. İtaliyalı mətbuatı yazır ki, holland futbolçunu komandanın bəzi futbolçuları da dəstəkləyirlər.

Bundan başqa qeyd olunur ki, son məğlubiyyət “Milan”ın sahibi Silvio Berluskonini özündən çıxarıb. Klubun sahibi İnzagini qarşılaşmadan dərhal sonra baş məşqçi postundan qovmaq istəsə də, klubun vitse-prezidenti Adriano Qalliani onu fikrindən daşındırıb.