Kapellonun müqaviləsinin bütün detalları Rusiya mətbuatına sızdı

Fabio Kapellonun Rusiya Futbol İttifaqı ilə imzaladığı müqavilənin detalları bəlli olub. Futbolxeber.az-ın məlumatına görə, sözləşmənin nüsxəsi “Novoy qazetı”nın əlinə keçib. Məlum olub ki, 68 yaşlı italiyalı mütəxəssisin Rusiya millisindəki illik qazancı 7 milyon avrodur. Rusiya millisi DÇ-2014-ə vəsiqə qazandığından Kapello 2 milyon gəlir əldə edib.

Rusiya millisi AVRO-2016-nın final mərhələsinə vəsiqə qazansa, Kapello 1 milyon, 1/8 finala vəsiqəyə görə 500 min, 1/4 final və yarımfinala görə isə italiyalı mütəxəssis 300 min mükafat qazana bilər. Rusiya millisi qitə birinciliyində final oynasa, Kapello daha 1 milyon avro irəli düşəcək.

2017-ci ildə Rusiyada keçiriləcək Konfederasiyalar Kubokunda Kapello yalnız komandası mükafatçılar arasında düşəcəyi təqdirdə mükafat alacaq. III yer üçün qazanc 150, ikincilik üçün 300 mindir. Rusiya millisi qalib olsa, Kapello 500 min gəlir əldə edəcək.

2018-ci ildə Rusiyanın ev sahibliyi edəcəyi dünya çempionatında 1/8 finala görə Kapellonun 1, 1/4 final və yarımfinala görə isə italiyalı mütəxəssisin daha 1,5 milyon avro gəlir əldə etməsi mümkündür. Əgər, 3 ildən sonra Rusiya yığması dünya çempionu tituluna sahib çıxsa, Kapello mükafat olaraq 5 milyon avro qazanacaq. 

Qeyd edək ki, italiyalı mütəxəssisin oğlu və meneceri olan Pyer Filippo Kapello məsələyə münasibət bildirmək istəməyib. O, qısaca müqavilənin nüsxəsinin mətbuatın əlinə keçməsini anlamadığını qeyd edib. Kiçik Kapello bildirib ki, bu, çox təəccüblü haldır.