Yurgen Klopp “Bavariya”nı çalışdıracaq?

Dortmund “Borussiya”sından ayrılan Yurgen Kloppun adı bir çox klubla yanaşı çəkilir. Futbolxeber.az-ın məlumatına görə, alman mütəxəssisin xidmətində maraqlı olan klublardan biri “Napoli”dir. Cari mövsüm başa çatdıqdan sonra Rafael Beniteslə vidalaşmağı planlaşdıran İtaliya təmsilçisi ispan mütəxəssisin gedişini Kloppla sığortalamaq istəyir.

Almaniya mətbuatında isə 47 yaşlı məşqçinin “Bavariya”nı çalışdıra biləcəyi haqda iddialar var. Belə ki, Qvardiolanın rəhbərliyi altında komanda ardıcıl ikinci il Çempionlar Liqasında istədiyi nəticəni qazana bilmir. Bu səbəbdən də yayda Qvardiolanın Münhen klubunu tərk edə biləcəyi iddia edilir. Bu baş verərsə, “Bavariya”da Qvardiolanı məhz Kloppun əvəzləyəcəyi qeyd olunur.