Prosineçki “El Klassiko”dan danışdı

Azərbaycan millisinin baş məşqçisi Robert Prosineçki bu gün İspaniya La Liqasının 28-ci turu çərçivəsində keçiriləcək “Barselona” - “Real” oyunu ilə bağlı fikirlərini açıqlayıb. Futbolxeber.az-ın Qol.az-a istinadən verdiyi məlumata görə, bir vaxtlar futbolçu kimi adları çəkilən hər iki komandada çıxış etmiş Prosineçki qeyd edib ki, bugünkü “El-klassiko”da çempionluğun taleyini həll edə bilər. “Mən bir çox “El-klassiko”da oynamışam. Hər iki komandanın formasını geyinmişəm. Əminliklə deyə bilərəm ki, bu, əsl derbidir. “Barselona” yaxşı formada olmasına baxmayaraq, uduza, ya da “Real” son vaxtlar xal itirsə də, bu matçda üç xal qazana bilər. Bir sözlə, bu cür derbidə nələrin baş verəcəyini proqnozlaşdırmaq olmur”.

Prosineçki bildirib ki, bugünkü derbi əvvəlikilərdən fərqlənəcək: “Turnir cədvəlində komandalar arasında cəmi bir xal fərq var. Ona görə də qeydə alınacaq nəticə çempionluğun taleyini həll edə bilər”.

Millimizin çalışdırıcısı Luis Enrikenin “Barselona”ya fərqli oyun üslubu gətirmədiyini söyləyib. Onun fikrincə, 2015-ci ilin əvvəlində Enrike ilə “Barsa”nın lideri Lionel Messi arasındakı gərginlik artıq yoxdur: “Barselona” eyni üslubda oynayır. Sadəcə, bir klubun bu qədər ulduz futbolçusunun olması böyük şansdır. Messi, Suares, Neymar, İnyesta bir hərəkətləri ilə oyunun taleyini həll etmək gücündə olan futbolçulardır”.