“Qarabağ”ın “evini yıxan” futbolçunu cəzalandırmadılar

Ukrayna Futbol Federasiyasının İntizam Komitəsi “Dnepr”in hücumçusu Nikola Kaliniçi cəzalandırmayıb. Futbolxeber.az-ın məlumatına görə, Kaliniç ölkə çempionatının 12-ci turu çərçivəsində “Şaxtyor”a qarşı baş tutan oyunda rəqib futbolçu Taras Stepanenkoya dirsəyi ilə zərbə endirməkdə günahlandırılırdı. Lakin görüşü idarə edən hakim İntizam Komitəsinə təqdim etdiyi izahatda vurğulayıb ki, həmin epizod hər iki futbolçu eyni anda yerə yıxılarkən baş verib. Bu zaman isə Kaliniç rəqibə qəsdən zərbə endirməyib, sadəcə onun dirsəyi Stepanenkoya toxunub. Bu səbəbdən də “Dnepr”in forvardı cəzadan yan qaçıb.

Xatırladaq ki, Kaliniç Avroliqanın dördüncü turu çərçivəsində Bakıda “Qarabağ”a qarşı keçirilən oyunda vurduğu 2 qolla komandasına qələbə qazandırıb.