“Spartak”ın əfsanəsi dünyasını dəyişdi

Moskva “Spartak”ının keçmiş yarımmüdafiəçisi Fyodor Çerenkov bu gün səhər saatlarında 56 yaşında dünyasını dəyişib. Futbolxeber.az-ın Rusiya mətbuatına istinadən verdiyi məlumata görə, bu barədə “Spartak”ın başqa bir keçmiş futbolçusu Yeqor Titov xəbər yayıb. O, tvitterdə yazıb: “Kumirlər gedir! Əfsanələr gedir! Bütöv bir EPOXA gedir! Sən dahi idin, F.F.Çerenkov! Dahi kimi də getdin. Bu gün səhər saat 4-də Fyodor Çerenkov dünyasını dəyişdi. Ölüm səbəbi beynindəki şişdir”.

Xatırladaq ki, Çerenkov “Spartak”ın heyətində 494 matçda meydana çıxıb və 121 qol vurub. “Xalq komandası”nın heyətində mərhum 3 dəfə SSRİ, 1 dəfə isə Rusiya çempionu olub. Həmçinin Rusiya kubokunu da qazanıb. Çerenkov 1983 və 1989-cü illərdə SSRİ-nin ən yaxşı oyunçusu seçilib. SSRİ yığmasında meydana çıxdığı 34 matçda 12 qol vurub. SSRİ-nin olimpiya yığmasında 10 matç keçirib və 6 dəfə fərqlənib. 1980-cı ildə Moskvada keçirilən Olimpiya Oyunlarında bürünc medala sahib çıxıb.