Atışma zamanı “Donbass Arena”ya yenidən ziyan dəydi

Donetsk “Şaxtyor”una məxsus olan “Donbass Arena”a stadionuna yenidən atışma zamanı ziyan görüb. Futbolxeber.az-ın məlumatına görə, bu haqda klubun yaydığı bəyanatda deyilir: “Sentyabrın 19-da 12:45-də “Donbass Arena”nın yaxınlığında 2 partlayış oldu. Ardınca isə atışma səsləri gəldi. Nəticədə arenanın şimal-şərq hasarına ciddi ziyan dəyib. Hadisə zamanı arenanın əməkdaşları dərhal təhlükəsiz yerə köçürülüblər. Onlardan heç kim xəsarət almayıb”.

Xatırladaq ki, avqustun 23-də atılan bombalar nəticəsində “Donbass Arena”ya ciddi ziyan dəymişdi. Klub tərəfindən ziyanın həcmi 1 milyon dollar olduğu bəyan edilib. Avqustun 29-dan 30-na keçən gecə isə klub bazasının əsas korpusu atəşə tutulub.