Berti Foqtsun keçmiş yetirməsi gəmidə anbardar işləyir

Şotlandiya millisinin keçmiş hücumçusu Kevin Kayl jurnalistlər tərəfindən fərqli sahədə çalışarkən görüntülənib. Futbolxeber.az-ın “Daily Record”a istinadən verdiyi məlumata görə, 33 yaşlı sabiq futbolçu hazırda gəmidə anbardar işləyir. Onun vəzifəsinə gəminin döşəməsini yumaq, otaqları qaydaya salmaq və s. daxildir. Kaylın aylıq əmək haqqısı 1600 funtdur. Halbuki o, “Sanderlend”də çıxış edərkən ayda 10 min funt-sterlinq məvacib alırdı.

Qeyd edək ki, Kevin Kayl karyerası ərzində “Sanderlend”, “Koventri”, “Vulverhempton”, “Kilmarnok”, “Qlazqo Reyncers” kimi klublarda çıxış edib. Şotlandiya millisində o, 2002-ci ildə debüt edib. Həmin vaxt Şotlandiya yığmasını hazırda millimizin baş məşqçisi olan Berti Foqts çalışdırırdı. Yığmada çıxış etdiyi 10 oyunda 1 dəfə fərqlənib.