Cerrard: “Çelsi” və “Mançester Siti” də bilir ki “Liverpul”u hesabdan silmək olmaz”

“Liverpul”un aparıcı üzvü Stiven Cerrard komandasının çempionluq şansını dəyərləndirib. Futbolxeber.az-ın məlumatına görə, təcrübəli futbolçu “qırmızılar”ın əsas rəqibi kimi “Çelsi” və “Mançester Siti”ni görür: “İnsanların bizi çempionluğa namizəd kimi görməsi çox yaxşı haldır. Bunu heç kim inkar edə bilməz. Biz həqiqətən də qızıl medallar uğrunda mübarizə aparırıq. İndiki məqamda sakitliyimizi qorumalı, addım-addım zirvəyə yaxınlaşmalıyıq. “Çelsi” və “Mançester Siti” hazırda çempionluq yolunda əsas rəqiblərimizdirlər. Amma hər iki rəqibimiz bilir ki “Liverpul”u hesabdan silmək olmaz. Həm də “Çelsi” və “Mançester Siti”dən fərqli olaraq, biz avrokuboklarda mübarizə aparmırıq. Premyer Liqanın hər oyununa istədiyimiz kimi hazırlaşa bilirik”.

Xatırladaq ki, ikinci pillədə qərarlaşan “Liverpul” lider “Çelsi”dən 4 xal geri qalır.