“Lankaran Open 2026”da narazılıq: “Bugünkü hadisələr fiaskodur”

“Lankaran Open 2026” Beynəlxalq Şahmat Festivalının 3-cü turunda narazılıq yaşanıb.

Futbolxeber.az saytına bu barədə yarışın iştirakçılarından olan tanınmış idman jurnalisti Ceyhun Əliyev məlumat verib.

“Açılış mərasimində baş hakim Şaiq Quliyev rəsmi şəkildə elan etdi ki, partiya bitən kimi iştirakçı dərhal zalı tərk etməlidir. Təəssüf ki, bu gün deyilənlərin yalnız elanda qaldığına şahid olduq. Ümumiyyətlə, bugünkü hadisələr fiaskodur. İştirakçılardan biri partiyası bitsə də, zalı tərk etmək əvəzinə mənim oynadığım masaya söykənərək partiyaya tamaşa edirdi. Onu iki dəfə uzaqlaşdırsam da, xeyri olmadı, yenidən masaya yaxınlaşdı. Başqa hakim də ona iki dəfə irad bildirsə də, xeyri olmadı. Yalnız 45 dəqiqədən sonra baş hakim Şaiq Quliyev onu zaldan uzaqlaşdırdı. 45 dəqiqə ərzində reqlament pozulursa, bu turnir necə beynəlxalq status daşıyır?”, - deyə C.Əliyev bildirib.

O qeyd edib ki, bu, yarışdakı yeganə qayda pozuntusu olmayıb:

“Yarış zalına daxil olarkən bütün iştirakçıların üstü yoxlanılır. İçəri nəinki telefon, adi dəmir metal belə keçirmək olmaz. Lakin eyvanda, siqaret çəkmək üçün ərazidə müxtləif şəxslərin, o cümlədən hakimlərin telefonla danışdığına şahid oldum. Əgər kimsə qadağan olunmuş əraziyə telefon keçiribsə, kim təminat verə bilər ki, həmin adam telefonla gediş qəbul etməyib və başqa şəxsə gediş ötürməyib?! Təəssüf ki, Azərbaycan Şahmat Federasiyasının prezidenti Mahir Məmmədovun başverənlərdən xəbəri yoxdur. İnanıram ki, bu açıqlamadan sonra o, genişmiqyaslı araşdırmalar aparacaq və tək Lənkəran deyil, Şəkidə baş verən biabırçı bağlanışa dair də hesabat tələb edib günahkarları ciddi formada cəzalandıracaq”.