İkiqat Olimpiya çempionunun oğlu Azərbaycan millisində

Rusiyalı fiqurlu konkisürən Aleksandr Plyuşenko Azərbaycan millisinin heyətində çıxış edəcək.

Futbolxeber.az saytının məlumatına görə, bu barədə “RIA Novosti Sport” yazıb.

Bildirilib ki, Rusiya Fiqurlu Konkisürmə Federasiyası mayın 21-də keçirilən iclasda gənc idmançının ölkə dəyişməsinə razılıq verib.

13 yaşlı Aleksandr gələn mövsümdən etibarən beynəlxalq turnirlərdə Azərbaycanı təmsil edə biləcək. Bunun üçün ona yalnız Beynəlxalq Konkisürmə İttifaqından (ISU) xüsusi icazə sənədi almaq qalır.

Qeyd edək ki, Aleksandr məşhur fiqurlu konkisürən, 2 dəfə Qış Olimpiya Oyunlarının qalibi, 3 dəfə dünya və 7 dəfə Avropa çempionu Yevgeni Plyuşenkonun oğludur.  Yevgeni Plyuşenko da məsələyə münasibət bildirib:

“Saşa 5 il müddətinə Azərbaycanın idman vətəndaşlığını alıb. Görək necə olacaq. Onun cəmi 13 yaşı var. Rusiya millisində olmayıb, bu mövsüm müxtəlif səbəblərdən yarışlara qatılmayıb və beləliklə, karantin müddətini keçib. Heç kimin yerini tutmayıb, mənim şəxsi akademiyamda məşq edib”.