Mahir Məmmədov: “Baku Open” turnirində iştirakçı sayına görə rekord qeydə alınıb”

“Baku Open” turnirinin böyük tarixi var. Son illərdə isə yarış böyük beynəlxalq şahmat festivalına çevrilib”.

Futbolxeber.az saytının məlumatına görə, bu sözləri Azərbaycan Şahmat Federasiyasının (AŞF) prezidenti Mahir Məmmədov Bakıda keçirilən “Baku Open” turniri barədə danışarkən deyib. O qeyd edib ki, indiki formatda və iştirakçı sayına görə ötən illərlə müqayisədə rekord göstərici qeydə alınıb: “Turnirdə 980 iştirakçı mübarizə aparır, yarış dörd nəsli əhatə edir və 15 ölkədən şahmatçılar iştirak edirlər. Turnirdə həm 12 yaşadək şahmatçılar üçün nəzərdə tutulmuş C qrup yarışları, həm A və B qrupları üzrə müxtəlif reytinqli şahmatçıların mübarizəsi, həm də ənənəvi olaraq veteranların Azərbaycan çempionatı təşkil olunur. “Chess Tour” yarışlar silsiləsi ötən il qəbul edilmiş format əsasında həyata keçirilir. Bu çərçivədə Azərbaycanın yeddi bölgəsində ümumilikdə səkkiz turnir təşkil olunaraq Azərbaycan “Chess Tour”a daxil edilir. Bu layihə ölkədə şahmatın kütləviliyinin artırılması və Azərbaycanın şahmat ölkəsi kimi beynəlxalq aləmdə daha da tanıdılması baxımından mühüm əhəmiyyət kəsb edir. Hazırda mübarizə davam edir və yarışlar çox maraqlı keçir. Ümid edirik ki, matçlar uğurlu, ədalətli və rəqabətli şəkildə başa çatacaq. Şahmatçılarımıza uğurlar arzulayırıq. Gələcəkdə daha böyük nəticələrin əldə olunmasını diləyirik”, - deyə Mahir Məmmədov bildirib.

O, həmçinin Avropa çempionatında qeydə alınan nəticələri də şərh edib. Mahir Məmmədov vurğulayıb ki, bu məsələyə müxtəlif nöqteyi-nəzərlərdən yanaşmaq mümkündür: “Lakin əsas yanaşma ədalətli oyun və təmiz mübarizə prinsipidir və sevindirici haldır ki, məhz bu prinsip özünü doğruldub. Son turda Məhəmməd Muradlı ilə hazırkı Azərbaycan çempionu Aydın Süleymanov arasında keçirilən partiya, eləcə də Nicat Abasovun oyunu turnirin nəticələri baxımından həlledici əhəmiyyət daşıyırdı. Əgər həmin partiyalarda qalibiyyət qeydə alınsaydı, Azərbaycan şahmatçılarının Avropa çempionluğuna iddiası daha da güclənərdi. Lakin gərgin və prinsipial mübarizə şəraitində keçən oyunlar heç-heçə ilə nəticələndi. Bu vəziyyətdən isə digər iştirakçı, yəni ukraynalı şahmatçı istifadə edərək Avropa çempionu adını qazandı. Bununla belə, ikinci, üçüncü və dördüncü yerləri Azərbaycan şahmatçıları tutub. Bu nəticə yüksək göstərici kimi dəyərləndirilir. Belə ki, turnirin əsas mərhələsində yüksək pillələrin əksəriyyəti Azərbaycan təmsilçiləri tərəfindən qazanılıb.

Mahir Məmmədov əlavə edib ki, birinci yer uğrunda şanslar yüksək olsa da, son anda qələbə mümkün olmayıb və bu dəfə nəticə belə formalaşıb".

Xatırladaq ki, “Baku Open” beynəlxalq şahmat festivalının ümumi mükafat fondu 50 min ABŞ dolları olacaq. Yarışa mayın 6-da yekun vurulacaq.