DÇ: İki güləşçimiz finalda

Belqradda start götürən güləş üzrə dünya çempionatının ilk gündə Azərbaycanın 3 güləşçimiz mübarizəyə qoşulub.

Futbolxeber.az saytının məlumatına görə, medal ümidlərimizdən dünya və ikiqat Avropa çempionu Eldəniz Əzizli  1/8 finalda Covanni Frenini (İtaliya) 8:0, 1/4 finalda isə Yu Şiotanini (Yaponiya) 9:0 məğlub edərək yarımfinala vəsiqə qazanıb. 

55 kq-da mübarizə aparan idmançımız yarımfinalda ABŞ təmsilçisi Maks Nouriyə 9:0 hesabı ilə qalib gələrək finala yüksəlib.

Onun həlledici görüşdəki rəqibi gürcüstanlı Nuqzari Tsurtsumia olacaq.

72 kq çəkidə yarışan Ülvü Qənizadə 1/8 finalda İbrahim Məhəmmədovu (Qazaxıstan) 4:2, 1/4 finalda Deyvid Dimitrovu (Bolqarıstan) 10:0 məğlub edib. O, yarımfinalda Səlçuk Cana (Türkiyə) 4:3 hesabı ilə qalib gələrək adını finala yazdırıb.

Sənan Süleymanov (77 kq) təsnifat mərhələsində İdris İbayevə (Almaniya) 7:8 uduzaraq medalsız qalıb.

Qeyd edək ki, final görüşləri sabah keçiriləcək.