Millimiz Estoniyaya qalib gəldi

Çimərlik futbolu üzrə Azərbaycan milli komandası Portuqaliyanın Nazare şəhərində təşkil olunan Dünya çempionatının seçmə mərhələsində növbəti oyununu keçirib.

Futbolxeber.az saytının məlumatına görə, qrupun son oyununda Estoniya yığması ilə qarşılaşan komandamız 4:3 hesablı qələbə qazanıb.

Avtoqolun qeydə alındığı oyunda millimizin digər qollarını Elçin Qasımov, Orxan Məmmədov və Sabir Allahquliyev vurub.

Qrupun digər oyununda Fransa və İsveçrə komandaları üz-üzə gələcək. Fransa millisi oyunun əsas vaxtında rəqibini iki top fərqi ilə məğlub edərsə, komandamız mübarizəsini dayandıracaq, əks təqdirdə növbəti mərhələyə vəsiqə qazanacaq. Millimiz növbəti mərhələyə vəsiqə qazanacağı halda 1/4 finalda, iyunun 25-də A qrupunun qalibi ilə üz-üzə gələcək.

Qeyd edək ki, A qrupunun qalibi bu axşam keçiriləcək Ukrayna - Portuqaliya oyunundan sonra məlum olacaq.