Orxan Səfərov Avropa çempionu oldu

Praqada cüdo üzrə Avropa çempionatı start götürüb.

Futbolxeber.az saytının məlumatına görə, yarışın ilk günündə Azərbaycan millisinin 6 üzvü tatami üzərinə çıxıb.

66 kq çəkidə mübarizə aparan Orxan Səfərov 1/16 finalda Manuel Lombardo (İtaliya), 1/8 finalda Matej Polyak (Slovakiya), 1/4 finalda Sebastyan Seydl (Almaniya) üzərində qələbə qazanıb. Finala gedən yolda serbiyalı Strahinya Bunçiçə qalib gələn idmançımız həlledici qarşılaşmada da İsrail cüdoçusu Tal Flikeri üstələyərək Avropa çempionu olub. Azərbaycan cüdoçusunun şərəfinə üçrəngli bayrağımız qaldırılıb, dövlət himnimiz səsləndirilib.

Nicat Şıxəlizadə 1/16 finalda moldovalı Vadim Buneskuya qalib gəlib. Təmsilçimiz fransalı Killian Le Bluxa uduzaraq növbəti mərhələdə dayanıb.

Qadın cüdoçularımız Aişə Qurbanlı, Leyla Əliyeva, Gültac Məmmədəliyeva və Aleksandra-Larisa Florian isə ilk görüşündəcə uduzaraq mübarizəni dayandırıb.

Qeyd edək ki, mötəbər yarışda Avropanın 40 ölkəsindən 345 cüdoçu qüvvəsini sınayır. Qitə çempionatına noyabrın 21-də yekun vurulacaq.