Yeni reytinq: Şəhriyar gerilədi, Teymur mövqeyini qorudu

Beynəlxalq Şahmat Federasiyası (FIDE) yeni reytinq siyahısını açıqlayıb.

Futbolxeber.az-ın qurumun saytına istinadən verdiyi məlumata görə, ilk "10-luq"da iki təmsilçimiz yer alıb.

Şəhriyar Məmmədyarov ötən reytinqlə müqayisədə 1 pillə geriləyərək 8-ci sıraya düşüb. Onun aktivində 2770 reytinq xalı var.

2765 xalı olan Dünya Kubokunun qalibi Teymur Rəcəbov isə 10-cu yerdəki mövqeyini qoruyub.

Digər təmsilçilərimizdən Nicat Abbasov 2668 xalla 3 pillə irəliləyərək, 72-ci sıraya yüksəlib. Qədir Hüseynov isə 2665 xalla 75-ci, 2654 xalı olan Rauf Məmmədov isə 95-ci sırada qərarlaşıb. Onların hər ikisi 2 pillə geriləyib.

Siyahıya yenə norveçli dünya çempionu Maqnus Karlsen 2862 xalla başçılıq edir. Əslən İtaliyadan olan ABŞ təmsilçisi Fabiano Karuana 2823 xalla 2-ci, çinli Dinq Liren 2791 xalla 3-cüdür.

Qadınlardan sıralamasında 2443 xalı olan Günay Məmmədzadə 28-ci sıradan 31-ci mövqeyə geriləyib. 2382 xala malik Gülnar Məmmədova 7 pillə geriləyərək 80-ci sırada yer alıb. 2376 xalı olan Xanım Balacayeva da eyni sayda gerilmə ilə 89-cu yerə enib.