"Bakı-2017"də medal sıralaması: Türkiyə lider, Azərbaycan ikincidir

Bakı-2017 IV İslam Həmrəyliyi Oyunlarında bu gün üçün nəzərdə tutulan yarışlar yekunlaşıb.

Futbolxeber.az saytının məlumatına görə, üçüncü yarış günündə mübarizəyə qoşulan Azərbaycanın idmançılarından daha 9-u qızıl medal qazanıb. Bununla da millimizin qızıllarının ümumi sayı 33-ə çatıb.

Komandamız bu gün 6 gümüş və 3 bürüncü də aktivinə yazdıraraq medal sayını 68-ə çatdırıb. Hazırda yığmamızın aktivində 33 qızıl, 23 gümüş və 12 bürünc medal var. Bu nəticə ilə millimiz medal sıralamasında liderlikdən 2-ci pilləyə düşüb.

Birinci yeri 35 qızıl medalla Türkiyə qərarlaşıb. Qardaş ölkə idmançıları ümumilikdə 92 medal (31 gümüş, 26 bürünc) qazanıblar.

Üçüncü pilləni isə 6 qızıl, 6 gümüş və 18 bürünc medalla Özbəkistan tutur.

İlk “10-luq”da həmçinin İndoneziya, İran, Əlcəzair, Misir, İordaniya, Türkmənistan və Qətər qərarlaşıb.