“Bakı-2017”də Azərbaycan - Türkiyə finalı

“Bakı-2017” IV İslam Həmrəyliyi Oyunlarında həndbol finalçılar məlum olub.

Futbolxeber.az saytının məlumatına görə, qadınların yarışında yarımfinal mərhələsinə Azərbaycan və Özbəkistan qarşılaşması ilə start verilib.

Milli komandamız rəqibinə asanlıqla - 42:25 hesabı ilə qalib gələrək finala yüksəlib.

Qadın həndbolçularımız finalda Kamerun yığmasını 34:18 hesabı ilə məğlub edən Türkiyə kollektivi ilə üz-üzə gələcəklər.

Xatırladaq ki, qrup mərhələsində millimiz “ay-ulduzlular”ı 27:22 hesabı ilə üstələyib.

Kişi həndbolçuların yarışında isə ilk finalçı Səudiyyə Ərəbistanı həndbolçuları olub. Səudiyyə Ərəbistanı komandası yarımfinalda İraq yığmasından üstün olub - 28:24.

Finala yüksələn digər komanda isə Əlcəzair üzərində 26:22 hesabı ilə qələbə qazanan Türkiyə yığmasıdır.

Kişi və qadın həndbolçular arasında final görüşləri mayın 14-də “Sərhədçi” İdman Olimpiya Mərkəzində keçiriləcək.