DÇ-2016: 1/8 finalçılardan 8-i məlumdur

Kolumbiyada futzal üzrə dünya çempionatı davam edir. Futbolxeber.az saytının məlumatına görə, artıq 1/8 finalçılardan 8-i məlumdur. Digər 8 vəsiqənin sahibi isə bu gün keçiriləcək E və F qruplarında son turun matçlarından sonra müəyyənləşəcək.

Artıq Kolumbiya, Paraqvay, Ukrayna, Braziliya, İtaliya, Portuqaliya, Tailand və Rusiya yığmaları ən yaxşı 16 komanda arasına yüksəliblər.

Hələlik 1/8 finalda baş tutacaq cütlərdən yalnız biri məlumdur. Bu, Kolumbiya - Paraqvay qarşıdurmasıdır.  

Ukrayna millisi 1/8 finalda E qrupunun birincisi ilə üz-üzə gələcək. Böyük ehtimalla, bu, Argentina yığması olacaq.

Braziliya 1/8 finalda B, E, F, İtaliya isə A, B, F qruplarından birinin üçüncüsü ilə üz-üzə gələcək.

Rusiya yığması 1/8 finalda A, C, D, Portuqaliya isə C, D, E qruplarından birinin üçüncüsü ilə görüşəcək.

B qrupunda Rusiyanın ardından ikinci olan Tailand yığması isə millimizin yer aldığı F qrupunun ikincisi ilə qarşılaşacaq. Yığmamız son turda İrana uduzmasa, 1/8 finalda məhz Tailandı sınağa çəkəcək.