Mərakeşli məşqçi millimizi təbrik etdi: “Taktiki gedişlərimiz faydasız oldu”

Futzal üzrə Mərakeş millisinin baş məşqçisi Hicham Dguig Kolumbiyada keçirilən dünya çempionatının ilk turunda Azərbaycana uduzduqları görüşdən danışıb.

Futbolxeber.az saytının məlumatına görə, afrikalı məşqçi 0:5 hesablı yenilgini belə şərh edib:

“Birinci hissədə daha yaxşı oynadıq. Hesab açıldıqdan sonra oyun intizamımız pozuldu. Çalışdıq ki, buraxılan qolun əvəzini çıxaq. Bunun üçün şansımız da oldu. Təəssüf ki, yararlana bilmədik. Sonra müəyyən dəyişikliklərə əl atdıq. Amma taktiki gedişlərimiz faydasız oldu. Futzalın maraqlı cəhətlərindən biri də budur. İlk oyun bizim üçün çox vacib idi, əfsus ki, ikinci hissədə dönüş yarada bilmədik. Qapıçımızın zədələnməsi də komandaya pis təsir etdi. Azərbaycan millisini qələbə münasibətilə təbrik edirəm”.