Nərgiz Umudova: “Prezidentin bizi qəbul etməsi qürurvericidir”

“Şahmatda doğma divarlar arasında oynamaq çətindir. Təzyiq olur. Amma bizim üçün belə deyil”. Futbolxeber.az saytının məlumatına görə, bu sözləri şahmatçı Nərgiz Umudova deyib.

Bakıda 42-ci Ümumdünya Şahmat Olimpiadasında qadınlardan ibarət ikinci yığmamız Yaponiya ilə qarşılaşır. Dördüncü lövhədə mübarizə aparan Nərgiz Umudova Misaki Şibatanı məğlub edib.

Mətbuat konfransında çıxış edən Umudova tamaçaşıların dəstəyini qeyd edib: “Tamaşaçıların dəstəyi bizə əlavə güc verir. Üzərimizdə hər hansı təzyiq hiss etmirik. Ailə üzvlərimiz, dostlarımız bizi dəstəkləyirər. Bu, bizə əlavə güc verir. Bu gün hər bir komandamızdan 4:0-lıq qələbə gözləmək mümnüdür. İnanıram ki, qələbə bizim olacaq”.

Təcrübəli şahmatçı ölkə başçısı İlham Əliyevin şahmatçılarımızla görüşündən də söz açıb: “Açılışdan öncə cənab prezident bizi qəbul etdi. Bu, qürurvericidir. Dünya praktikasında belə hala az rast gəlinir. Çox nadir ölkələrdə idmana dövlət səviyyəsində bu cür qayğı göstərilir. Bu isə gənclərin şahmatla məşğul olmasına stimul verəcək”.