“Azərbaycanı və “Qəbələ”ni ən yaxşı şəkildə təmsil edib, qələbə qazanacağıma inanıram”

Azərbaycan kikboksinq tarixində ilk dəfə olaraq ölkəmizi və "Qəbələ" İdman Klubunu beynəlxalq arenada təmsil edən Pərviz Abdullayev "Glory World Series"də çıxış edəcək. Futbolxeber.az-ın məlumatına görə, bununla bağlı mətbuat konfransı keçirilib.

Tədbiri giriş sözü ilə “Qəbələ” İK-nın digər idman növləri üzrə kuratoru Səbuhi Qarayev açıq élan edib. O, “Qəbələ” klubunun təkcə futboldan ibarət olmadığını bildirib, digər idman növlərində də klubun uğurlu çıxışlarını xatırlayıb.

Daha sonra söz dekabrın 4-də Amsterdamda mərakeşli Aziz Kallahla döyüşəcək Pərviz Abdullayev fikirlərini açıqlayıb: “Bu, peşəkar kikboksinqdə ən yüksək turnirdi. "Glory World Series"də çıxış etmək hər idmançıya qismət olmur. Azərbaycanı və “Qəbələ”ni ən yaxşı şəkildə təmsil edəcəyimə və qələbə qazanacağıma inanıram. Fikrimcə, bundan sonra müqavilə imzalayıb, yarışda çıxışımı davam etdirəcəyəm. Qələbə qazanacağım halda çox güman ki, daha 1 illik razılaşma olacaq olur və həmin müddətdə 3-4 döyüş keçirəcəyəm. Həmin vaxt artıq super ulduzlarla qarşılaşıracağam”.

İdmançımız hazırlıqları barədə də söz açıb: “Füzuli Musayevlə hazırlıq keçmək mənim üçün faydalıdı. O, karateçi olduğundan hazırda  ayaqlarla daha yaxşı işləyirəm. Oktyabrın 16-da Rumıniyada qələbə qazandım və 1 həftə sonradan bu qarşılaşma üçün hazırlıqlara başlamışam. Yaxşı formadayam”.

Abdullayev növbəti rəqibi haqda da danışıb: “Yaşı az olsa da, "Glory World Series"də iştirak hüququ qazanıb. Deməli, güclü idmançıdı. Əsasən 2 nömrə kimi döyüşür. Döyüşdə ehtiyatlı olmalısan. Əsas odur zərbə buraxıb, zədələnməyəsən və görüş yarımçıq saxlanılmasın. Bunun üçün hücumda döyüşəcəyəm”.

Pərviz Abdullayev bir qədər öncə İtaliyada erməni ilə döyüşməli olsa da,  rəqibinin zədə bəhanəsi səbəbindən görüş baş tutmayıb. Buna baxmayaraq, Pərviz "Glory World Series"də düşmən ölkə təmsilçisi ilə qarşılaşmaq arzusundadı: “Döyüşmək istədiyim çox rəqiblər var. Onlardan biri Corc Petrosyan İtaliyanı təmsil edir”.

“Amsterdam Arena”da baş tutacaq görüşə 1 ay öncədən bütün biletlər satılıb. Qarşılaşmaya yaxşı hazırlaşdıq və qələbəyə ümid edirik”. Bunu isə Abdullayevin meneceri Faiq Abdullayev deyib.

Onun şəxsi məşqçisi Mehman Umudov da döyüşlə bağlı fikirlərini açıqlayıb: “Bu bizim arzumuz idi. Hamı tələbəsinin bu yarışda iştirakını istəyər. Rəqibi izləmişik, ona qarşı lazımınca hazırlaşmışıq. Pərviz Abdullayev dğyüşə tam hazırdı”.