Azərbaycan çempionunun kurslarda iştirak üçün köməyə ehtiyacı var

Futzal üzrə son Azərbaycan çempionatının qalibi olan, lakin artıq tarixin yaddaşına qovuşan “Xəzər Adaları”nın sabiq baş məşqçisi Elnur Qəmbərov Moskvaya yollanıb. Bu haqda Futbolxeber.az saytına gənc məşqçinin özü məlumat verib: “15 gün “Qazprom” komandasının bazasında oldum. Komandanın məşqlərini izlədim. Orada məni çox yaxşı qarşıladılar. “Qazprom”un baş məşqçisi daha əvvəl milli komandamızın və “Araz Naxçıvan”ın formasını geymiş Kakadır. Daha sonra Moskva “Dinamo”sunun da düşərgəsini ziyarət etdim. Orada da həm taktiki, həm fiziki məşqləri izlədim”.

Qəmbərov qeyd edib ki, səfər öz hesabına reallaşıb: “Praktika üçün Moskvaya yollanmağı bir müddətdir istəyirdim. Kömək üçün çox adam ağız açsam da, heç kimdən müsbət cavab ala bilmədim. Yekuna səfərə öz hesabıma yollandım”.

Qəmbərov bildirib ki, məşqçi kursuna dəvət alıb: “Səfər müddətində Rusiya millisinin baş məşqçisi Sergey Skoroviçlə də görüşüm oldu. O məni tezliklə baş tutacaq lisenziya kursuna dəvət etdi. Həmin kurslara Portuqaliya millisinin baş məşqçisi rəhbərlik edəcək. Lakin hazırda həmin kurslarda iştirak edib-etməyəcəyimi bilmirəm”.

“Kurslarda iştirak üçün nə qədər pul lazımdır” sualını Qəmbərov belə cavablandırıb: “1000-1500 dollar. Hazırda belə bir imkanım yoxdur. Ona görə də köməyə ehtiyacım var. Kurslarda iştirakı çox istəyirəm. Çünki məşqçi məhz bu cür kurslar sayəsində biliyini artırır”.