“Zəkiyev gözünün nurunu bu Vətən üçün fəda verdiyi üçün onunla fəxr edirik”

Bu gün Milli Olimpiya Komitəsinin (MOK) inzibati binasında Bakı-2015 I Avropa Oyunlarının mükafatçıları ilə ənənəvi görüş keçirilib. Futbolxeber.az-ın apasport.az-a istinadən verdiyi məlumata görə, MOK-un vitse-prezidenti Çingiz Hüseynzadənin qatıldığı görüşdə yarışın XV günündə, yəni dünən medal qazanan idmançılar iştirak ediblər.

MOK rəsmisi qızıl mükafat qazanan Elvin Məmişzadə (boks, 52 kq), Lorenzo Sotomayor (boks, 64 kq) və İlham Zəkiyev (paracüdo, +90 kq), gümüş medalçı Səbinə Abdullayeva (paracüdo, 57 kq), həmçinin bürünc mükafat qazanan Zakir Mislimovu (paracüdo, +90 kq) mükafatlandırıb.

Tədbirin əvvəlində çıxış edən Çingiz Hüseynzadə paracüdo yarışında qızıl medal qazanan İlham Zəkiyevin uğurunu xüsusi vurğulayıb: “İlham Zəkiyev dünənki çıxışı ilə hər kəsə həyəcanlı anlar yaşatdı. Cənab prezident İlham Əliyev də onun sevincinə şərik oldu. Zəkiyev gözünün nurunu bu Vətən üçün fəda verdiyi üçün onunla fəxr edirik”.

Hüseynzadə, həmçinin bu gün də idmançılarımızdan medallar gözlədiklərini söyləyib.

Daha sonra xüsusi şərəf lövhəsinə imza atan idmançılarımıza hədiyyələr təqdim olunub.