Könül Nurullayeva: “Medal siyahısında hazırkı yerimizi qoruya biləcəyik”

“Əldə etdiyimiz uğur təkcə mənim yox, dövlətimizin, idmançılarımızın uğurudu. Ümid edirəm ki, medal siyahısında hazırkı yerimizi qoruya biləcəyik”. Futbolxeber.az-ın məlumatına görə, bu sözləri Bakı-2015 Avropa Oyunlarında Azərbaycan nümayəndə heyətinin rəhbəri Könül Nurullayeva deyib.

Eyni zamanda, Azərbaycan Milli Olimpiya Komitəsinin (MOK) və Atletika Federasiyasının beynəlxalq əlaqələr şöbəsinin müdiri bu gün keçirilən mətbuat konfransında qazanılan medalların sayından məmnun qaldığını deyib: “Nümayəndə heyətinin rəhbərinin medalları hesablamaqla yanaşı, başqa işləri də var. Biz nümayəndə heyətinin qayğısına qalmalıyıq. Biz çox yüksək nəticə gözləyirdik və bu nəticə də hamımızı sevindirir”.

Nurullayeva bildirib ki, nümayəndə heyəti tam tərkibdə Atletlər Kəndindədi: “Bir neçə Olimpiadada iştirak etmişəm. Müəyyən təcrübəm var. Olimpiya standartlarından heç də geri qalmır. Hətta bəzi məqamlarda üstələyir”.

O, MOK-un hadisələrdən kənarda qalması ilə bağlı sualı belə cavablandırıb: “MOK gündəlik olaraq, mətbuat konfransı təşkil edir, qalib gələn idmançılarla görüş təşkil edir. Mətbuat da bunu geniş işıqlandırır. Yəni, MOK bu məsələlərdən kənarda deyil”.

Mənbə: apasport.az