“Bakı-2015”: Teymur Məmmədov Azərbaycana boksda ilk qızıl medalı qazandırdı

Bakı-2015 Avropa Oyunlarına boks yarışları yekunlaşmaq üzrədir. Futbolxeber.az-ın məlumatına görə, artıq bir neçə çəki dərəcəsində qaliblər məlumdur.

81 kq çəki dərəcəsində yarışan Teymur Məmmədov finalda italiyalı Valentino Manfredonianı 3:0 hesabı ilə məğlub edərək birinci Avropa Oyunlarının çempionu olub. Bununla da Məmmədov “Bakı-2015”də ölkəmizə boks yarışlarında ilk qızıl medalı qazandırıb.

91 kq-da yarışan Məhəmmədrəsul Məcidov rusiyalı Qasan Gimbatovla qarşılaşmalı olsa da, döyüş baş tutmayıb. Məcidov zədə səbəbindən qarşılaşmaya çıxmayıb və bürünc medala sahib çıxıb.

Qadınlar arasında 54 kq çəki dərəcəsində mübarizə aparan idmançımız Anna Əlimərdanova yarımfinalda Rusiya idmançısı Yelena Savelevaya uduzub. Bununla da Əlimərdanova da “Bakı-2015”i bürünc medalla tamamlayıb.

52 kq-da yarışan Elvin Məmişzadə yarımfinalda almaniyalı Hamza Tubaya, 64 kq-da mübarizə aparan Lorenzo Sotomayor isə ukraynalı Viktor Petrova qalib gəlib. Hər iki boksçumuz sabah finalda italiyalı rəqiblərlə üz-üzə gələcək.

Xatırladaq ki, buna qədər boks yarışlarında Tayfur Əliyev də yarımfinalda uduzmaqla, bürünc medala sahib çıxıb.